तुझ्या टपोर डोळ्यात, माझ इवलंस गाव - ९

तुझ हसण सजणी, जणू नक्षत्रांच लेन
त्याच्यापुढे दुनियेशी, मला नाही देन घेण
सखे हसतेस तेव्हा, पडे चांदण्यांचा सडा
असा बहरून आला, तुझ्या रूपाचा केवडा
तुझ हसण सजणी, तन मन जागवित
तुझ्या हसण्यात गीता, हसण्यात भागवत
तुझ हसण सजणी, नाही तसं साधसुध
लोक झेलतात जसा, कोळ्या देवीचा प्रसाद
तुझे हसतात ओठ, तुझे डोळेही हसती
देव तुझ्या हसण्याची, वाट पाहत बसती
नाही कुणावर दोष, नाही कुणावर टीका
तुझ्या हसण्याच्या पुढे, सखे स्वर्ग फिका फिका
माझा स्वर्ग तुझ्या पायी, तुझ्यावर माझी धाव
तुझ्या टपोर डोळ्यात, माझ इवलंस गाव ||९||